براہوئی اکیڈمی(رجسٹرڈ) پاکستان کن دا اسِہ ترمی(تاریخی) اَو مَٹسٹی(انقلابی) ساہْتس ئے کہ نن تینا کئی سالتا سماساری(علمی) اَو دُوِیچِری (ادبی) نت دُو خلنگےپُوسکُنا ڈیجیٹل کوڑی(دُنیا) نا گُرجا تا رِدَٹ همتوار کننگُن۔ 1959ء ہراتم براہوئی اکیڈمی نا ماس(بنیاد) تِخِنگا، تمیچ(مقصد) بیرہ اسہ ادارسِ نا اڈ تننگ اَلو ، ایکہ اسہ مُتکُنو ترم اَو خید خواری خلوکو دوددھرسِ(تہذیب)نا رکھ کن نت دُو خلنگ نا موکشنگ هم اس۔

ننے فخرے کہ نواب غوث بخش خان رئیساڑی(مُہیکو کماش)نا بھلُنی اَو بابائے براہوئی نور محمد پروانہ (جنرل سیکرٹری) نا نت دُو خلنگَٹ مو کشوکا دا سما ساری آلم عبدالرحمان کرد، غلام حیدر حسرت، ڈاکٹر ایم صلاح الدین مینگل(تمغہ امتیاز) اَو ڈاکٹر عبدالرحمان براہوئی صاحب آن بارا بھلا عالم اَو دانشورتاچائنگ اَو کسر شونی ئٹ مرسا اینو اسہ پُوسکُنو پھِڑسِ آ سر مَسنے۔ براہوئی اکیڈمی شش صد آن خُڑک پھوتی(کتاب) چھاپ تالان کرسا براہوئی دُوِیچر (ادب ) نا اسہ بھلو مَڈیس ٹاہانے، ہرا ننا براہوئی نا دُرُستی راستی نا ڈیکھ ارے۔

دا ہیت اُستے بھاز ہُسون کیک کہ داخس بھاز سماساری (علمی) اَو دُوِیچِری(ادبی)نت دُو اَو خید خواری خلنگ آن گُڈ هم براہوئی اکیڈمی اینو تینا جِندَنا جھُگ اَو ماڑِیسِ آن دُوسِلوک ارےاَو نن اندنو "پہوالی" سماساری زندس تدیفنگُن ایکہ تینا جِندَنا ہنکین مفننگ ننا اُست بڑائی ئے بِٹِنگ کتنے۔رُلِنگ اَو همپ بِٹ نا دا چَک اَو چگرو گری ٹی هم نناپٹسٹ اَو خید خواری نا کسر اسہ هم سلتنے۔ اندا مہرَنا پدے کہ اینو نن دا شیفکو کاریمتِ تون عالمی پھِڑ آگام تخنگُن۔

اکیڈمی نا غُٹے چھاپ مروکا کتاباک ، آرٹیکلاک ،رپورٹاک داسا اسہ کِلِک تون دُوئی مریرہ۔

جولائی 2025آن مونی بروکا مُسہ توئی نیوز لیٹر دا سا ڈیجیٹل وڑَ ٹی هم دُوئی مریک۔

"براہوئی " نناسماساری جاچَ ناپٹسٹی جرنل عالمی سماساری ٹبراتِسکان برابر سر مریک۔

دا ویب سائٹ بیرہ اسہ گِروکیو پورٹلس اف ایکہ براہوئی دُوی، کرَچِر(کلچر) ، ترم(تاریخ) اَو قدراتے عالمی پھِڑآنِروار کننگ نا خننگوکو ٹُھلس ئے۔ نن تینا گُجہ نا روتہ مرِسا پُوسکُنا ترمَ تون هم کوپہ مونی اِننگ ناتمیچہ کرینُن۔ ای سماساریا وَڑِیتے، براہوئی دُوی تون مہر تخوکا دا سما ساری کندوری آن فائدہ ارفنگ کن بَٹِنگِوہ کہ بریر دا ڑان فائدہ دُوئی کیر۔